Suzhou Challenger. Мамлакатимизнинг етакчи теннисчилари асосий тўрнинг илк даврасида кортга чиқишди

Мамлакатимизнинг биринчи ва иккинчи ракеткалари — Ҳумоюн Султонов ҳамда Сергей Фомин мусобақанинг саралаш баҳсларидаги иштироклари орқали асосий тўрга йўл олганди. Султонов икки саралаш учрашувида ғалаба қозонган бўлса, Фомин ютқазса-да, омадли мағлуб сифатида турнирнинг асосий иштирокчилари сафига қўшилганди.    

Ҳар икки теннисчимиз бугун асосий тўрнинг илк давра учрашувини ўтказишди. ATP рейтингида 395-ўринни эгаллаб турган Ҳумоюн Хитой Тайпейи шарафини ҳимоя қилаётган Ву Тинг Линга кутилмаганда 5/7, 3/6 ҳисобида имкониятни бой бериб қўйди. Ву Тинг ATP рейтингида 529-поғонадан жой олган бўлиб, у ҳам ҳамюртимиз сингари асосий тўрга саралаш баҳслари орқали етиб келганди. 

Бироз аввал якунига етган Сергей Фомин иштирокидаги учрашув ҳам биз учун омадсиз бўлди. Теннисчимиз япониялик Рента Токудога фақат биринчи сетда қаршилик кўрсата олди - 4/6, 1/6. Тенннисчилар шу кунгача ўзаро уч маротаба тўқнаш келишган бўлса, барчасида Кунчиқар юрт вакили зафар қучган.