Таэквондо бўйича Олимпиада совриндори UFC билан шартнома имзолади

Оғир вазнли Деспейн 2012 йилги Лондон Олимпиадасининг таэквондо баҳсларида бронза медалини қўлга киритган эди. Икки метр бўйга эга кубалик аралаш яккакурашда 4 та жанг ўтказиб, барчасида муддатидан аввал ғалаба қозонган. 

Эътиборлиси, Робелис барча жангларида рақибларини биринчи раунддаёқ нокаутга учратган. Охирги учта жангидаги ғалабалари учун 19 сониягина вақт сарфлаган. UFC шартномасини тақдим этган тўртинчи жангини икки кун аввал Fury FC лигасида Майлс Бэнксга қарши ўтказиб, рақибини 4-сониядаёқ нокаут қилганди.

Робелис Деспейн Олимпиададаги муваффақиятидан ташқари жаҳон чемпионатининг икки карра бронза медали соҳиби ҳисобланади. 2014 йилда Марказий Америка ҳамда Кариб ҳавзаси ўйинларида чемпионлик шоҳсупасига кўтарилган. Ҳозирча Деспейннинг UFC лигасидаги дебюти қачон бўлиши маълум эмас.