Таиландда “World Abilitysport-2024” ўйинлари бошланди

Бутунжаҳон ёшлар ўйинлари мақомида ўтказилаётган мазкур мусобақаларда имконияти чекланган ёшлар пара спортнинг тўртта турида ғолиблик учун кураш олиб боради. "Лос-Анжелес-2028" Паралимпия ўйинларига тайёргарликнинг муҳим босқичи бўлган бу галги “World Abilitysport-2024” ўйинларининг илк кунида бочча спорт тури бўйича баҳслар ташкил этилади.  

Мусобақаларда дунёнинг кўплаб давлат спорт делегациялари иштирок этиш талабномаларини тақдим этган бўлса, Ўзбекистоннинг  20 нафардан зиёд пара спортчилари пара енгил атлетика ва пара пауэрлифтингда совринли ўринларга даъвогарлик қилади.  

Ташкилий қўмита маълумотига кўра, пара енгил атлетика мусобақаларида 138 нафар матонат соҳиблари баҳсларда иштирок этса, пауэрлифтинг беллашувларида 40 та давлат вакиллари иштирокини тасдиқлаган. Ўйинлар 6 декабрга қадар давом этади.