Тараздаги халқаро турнирда 20 та медаль қўлга киритилди

Бахитжан Ташметов хотирасига бағишлаб ўтказилган ушбу анъанавий турнирда мезбонлардан ташқари Тожикистон, Қирғизистон, Туркманистон ва Ўзбекистон спортчилари татамига чиқишди. 

Халқаро турнирда юртимиз шарафини Тоҳир Файзиев мураббийлигидаги жами 21 нафар ўсмир дзюдочиларимиз ҳимоя қилишди. Дзюдочиларимиз Тараздаги мусобақада жами 20 та медалга эга чиқишди.  

Ҳамюртларимиздан Суҳроб Пўлатов (-50 кг), Жавлонбек Хайруллаев (-73 кг), Жаҳонгир Маматкаримов (-81 кг), Муҳаммад Мансуров (-90 кг), Муҳайё Ахматова (-40 кг) ва Фарангиз Режепова (-57 кг) ўз вазн тоифаларида барча рақибларини мағлуб этиб, олтин медални қўлга киритишди. 

Санжар Пардаев (-73 кг), Дилола Деҳкамбаева (-48 кг), Исломбек Равшанқулов (+90 кг) ва Хосият Машарипова (+70 кг) финалга қадар етиб бориб, кумуш медалга сазовор бўлишди.  

Собиржон Каримов (-55 кг), Диёрбек Дурмаматов (-50 кг), Жалолиддин Болтабаев (-66 кг), Қаҳрамон Раҳмонов (+90 кг), Ирисхон Қурбонбоева (-70 кг) сингари жами 10 нафар дзюдочимиз бронза медали билан Ўзбекистонга қайтди. 

Умумжамоа ҳисобида Ўзбекистон терма жамоаси 6 та олтин, 4 та кумуш, 10 та бронза медали билан иккинчи ўринни эгаллади. Ушбу мусобақа терма жамоамиз аъзоларига 25-29 сентябрь кунлари Қозоғистоннинг Алмати шаҳрида ўтказиладиган кадетлар ўртасидаги жаҳон чемпионатига тайёргарлик вазифасини ўтаб берди.