Тарихий тўқнашув: Нидерландия Ўзбекистоннинг Европадан бўлган 17-рақибига айланади

Кучли ва номдор Нидерландия терма жамоасига қарши баҳс нафақат бугунги куннинг бош воқеаси, балки ўзбек футболи солномасида ҳам янги саҳифа очади.

Гап шундаки, Нидерландия терма жамоаси Ўзбекистон миллий терма жамоаси ўз тарихида тўқнаш келадиган Европанинг (УЕФА аъзоси) роппа-роса 17-жамоаси бўлади. Шу кунгача вакилларимиз Кўҳна қитъанинг 16 та турли терма жамоаларига қарши яшил майдонга тушишган.

Статистикага назар ташласак, Ўзбекистон терма жамоаси Европа вакиллари орасида энг кўп Озарбайжон (10 марта) ва Қозоғистон (7 марта) билан куч синашган. 

Умумий рўйхат эса қуйидагича кўринишга эга:

Озарбайжон — 10 та ўйин

Қозоғистон — 7 та ўйин

Беларусь — 3 та ўйин

Грузия, Украина — 2 тадан ўйин

Латвия, Словакия, Эстония, Швеция, Туркия, Россия, Босния ва Герцеговина, Албания, Арманистон, Исроил, Черногория — 1 тадан ўйин.

Бугунги баҳс ушбу географияни янада кенгайтиради. Нидерландия билан учрашув вакилларимиз учун Колумбияга қарши баҳс олдидан катта тажриба ва жиддий имтиҳон бўлиши шубҳасиз.

Маълумот учун, Ўзбекистон – Нидерландия беллашуви соат 23:45 да старт олади.