Тарихни янгилашга яқин келган Шоҳида Тошкентга бронза медали билан қайтади

Аёллар кураши бўйича ўтказилган баҳсларда тарихни янгилашга жуда яқин келган ҳамюртимиз Шоҳида Аҳмедова Тошкентга қуруқ қўл билан қайтмайдиган бўлди. 57 кг вазн тоифасида юртимиз шарафини ҳимоя қилган ўсмирлар Олимпиадасининг кумуш медали совриндори Токио Олимпиадаси йўлланмаси учун кечган ярим финал учрашувида ҳиндистонлик Аншу Аншуга имкониятни бой бериб қўйганди. Аҳмедова лицензион турнирнинг бронза медали учун бўлиб ўтган баҳсда кореялик Ум Жиюнни 4-0 ҳисобида доғда қолдирди.

Эслатиб ўтамиз, шу кунгача Ўзбекистон аёллар эркин кураши терма жамоаси тўрт йилликнинг энг нуфузли мусобақасида иштирок этмаган. Энди бор умидимиз май ойида Болгариянинг София шаҳрида ўтказиладиган жаҳон лицензион турниридан. Ушбу мусобақа Токио Олимпиадасига сўнгги лицензион турнир ҳисобланади.