Тартиб-интизом қўмитаси 1-турдаги қоидабузарликлар бўйича қарор чиқарди: Бабаян жаримага тортилди

Самвел Бабаянга жарима тортилди

27 февраль куни бўлиб ўтган "Андижон" — "Сўғдиёна" учрашувининг 44-дақиқасида андижонликлар бош мураббийи Самвел Бабаян майдон четида рақиб футболчисининг тўп билан ҳаракатланишига атайлаб халақит бергани аниқланди. Шу сабабли, қўмита Тартиб-интизом кодексининг 61-моддасига асосан мутахассисга нисбатан жарима интизомий жазо чорасини қўллади.

"Бунёдкор"га жиддий огоҳлантириш берилди

1 март санасидаги ОКМК — "Бунёдкор" баҳсида тошкентликлар футболчиси Дмитрий Плетнёв ҳакам қарорига норозилик билдиргани учун сариқ карточка билан огоҳлантирилган эди. Ушбу ҳолат бўйича ҳакамнинг билдиргиси кўриб чиқилди ва Суперлига Регламентининг 15.37-бандига мувофиқ, "Бунёдкор" клубига огоҳлантириш интизомий жазо чораси белгиланди.

Эндиликда регламентнинг мазкур бандига кўра, мавсумнинг қолган қисмида "Бунёдкор" футболчилари томонидан симуляция, вақтни чўзиш ёки ҳакам қарорига эътироз сабабли сариқ карточка олинса, уларга нисбатан тўғридан-тўғри жарима интизомий жазо чораси қўлланилади.