"Tashkent Chess 2024" бош соврини ва 100 000 000 Ҳиндистонга кетди

Мукофот жамғармаси 300 миллион сўмни ташкил этган "Tashkent Chess 2024" турнирида юртимиз шахматчилари билан бир қатор дунёнинг 15 давлатидан келган жами 400 нафарга яқин иштирокчи бош соврин учун баҳс олиб боришди. 

Тўққиз тур якунларига ҳиндистонлик гроссмейстер Адҳибан Баскаран 7,5 очко билан мусобақа ғолиби ҳамда 100 миллион сўм миқдорида пул мукофоти соҳибига айланди. Собиқ ҳамюртимиз Тимур Гареев 7 очко билан иккинчи ўринни эгаллади. Кучли учликка Азамат Утегалиев якун ясаб берди. Қозоғистонлик 6 очко билан қўшимча кўрсаткичларга кўра учинчи поғонани банд этди. 

Хитойлик Рен Жиэ Ҳуанг, қозоғистонлик Ринат Жумабоев ва ҳамюртимиз Абдумалик Абдусалимов ҳам 6 очко жамғарди. Улар қўшимча коэфицентларга кўра кейинги ўринларни бўлишиб олишди. Иккинчи ўрин эгаси 50, учинчи ўрин соҳиби 25 миллион сўм мукофот пулига ҳам эга чиқди.      

Пойтахтимиздаги "Ренессанс" кино уйида "Tashkent Chess 2024" - Тошкент шаҳар ҳокими кубоги ғолибларини тантанали тақдирлаш маросими бўлиб ўтди. Тадбирда Тошкент шаҳар ҳокими Шавкат Умурзоқов сўзга чиқиб, бундай мусобақалар шахмат спортини ривожлантиришда муҳим аҳамиятга эга эканлигини таъкидлади.