"Tashkent City Mall"да юлдузлар ёғдуси

Кўтаринки кайфият, позитив онларни туҳфа этган тадбирда Осиё Олимпия Кенгаши вице-президенти Отабек Умаров, Ўзбекистон Республикаси Спорт вазири Адҳам Икрамов, вазир ўринбосари Шаҳрулло Маҳмудов, вазир маслаҳатчиси Аваз Каримов, Миллий олимпия қўмитаси Бош котиби Ойбек Касимов, МОҚ раиси ўринбосарлари Азизжон Камилов, Шерзод Ташматов, Паралимпия Қўмитаси раиси Мухторхон Ташходжаев ва бошқа расмийлар иштирок этишди.

Тадбир авввалида сўзга чиққанлар Халқаро дзюдо куни билан барчани қутлаб, дзюдочиларимизни йил давомидаги мусобақалар, хусусан Париж-2024 Олимпиадасида муваффақиятли тарзда иштирок этгани билан табриклашди. 

Байрамона тадбирда Олимпия ўйинлари чемпиони Диёра Келдиёрова, Олимпиаданинг бронза медали совриндори Музаффарбек Тўрабоев ёш дзюдочилар учун маҳорат сабоқларини намойиш этди. Савдо мажмуасига йиғилганлар, шаҳримиз меҳмонлари мураббий Ўлмас Гуллиев шогирдларининг кўргазмали чиқишларидан баҳраманд бўлишди. 

Тадбир иштирокчилари Олимпиада оиласига мансуб дзюдо спорт тури билан яқиндан танишиш имкониятига эга бўлишди. Турли кўнгилочар шоу дастурлар, спортимиз юлдузлари билан фотосесия жараёни барчага қувончли лаҳзаларни тақдим этди.