Tashkent Open. Бугун Саидакбар чемпионлик учун дона суради

Республика ихтисослаштирилган болалар-ўсмирлар шахмат мактаби мезбонлик қилаётган мусобақада юртимиз шахматчиларидан ташқари Россия, Бразилия, Беларусь, Озарбайжон, АҚШ, Эрон, Арманистон, Марказий Осиё мамлакатларидан келган спортчилар бош мукофот учун дона суришяпти. 

Тошкент Опен турнири швейцарча тизимда 9 турдан иборат бўлиб, бугун ғолиб ва совриндорлар номи маълум бўлади. Бугун ўтказиладиган сўнгги тўққизинчи турда ёш шахматчимиз Саидакбар Сайдалиев (2390) биринчи тахтада чемпионлик учун дона суради. Ҳамюртимиз оқ доналарда ўзи сингари 6,5 очко жамғариб турган беларуслик гроссмейстер Алексей Фёдоров (2552)га қарши ҳаракат қилади. 

Айнан мана шу баҳс катта эҳтимол билан Тошкент Опен турнири ғолибини аниқлаб беради. Совринли ўринлар учун яна бир даъвогар ҳамюртимиз Шамсиддин Воҳидов бугун қора доналарда Валерий Казаковскийга қарши баҳс олиб боради. Бу икки шахматчи ҳисобида 6тадан очко бор. 

Бугун ўтказиладиган сўнгги 9-тур олдидан мусобақа жадвалида Алексей Фёдоров ва Саидакбар Сайдалиев 6,5тадан очко жамғариб, қўшҳокимлик қилишяпти. 

Маълумот учун, анъанавий тарзда ўтказиб келинаётган халқаро турнирнинг мукофот жамғармаси 20 000 АҚШ долларини ташкил қилади. Асосий гуруҳда биринчи ўринни эгаллаган шахматчи 3 000 долларга эга бўлади.