Tashkent Open. Нодирбек ва Шамсиддин ҳамон пешқадамлар сафида!

Республика ихтисослаштирилган болалар-ўсмирлар шахмат мактаби мезбонлик қилаётган мусобақада юртимиз шахматчиларидан ташқари Россия, Бразилия, Беларусь, Озарбайжон, АҚШ, Эрон, Марказий Осиё мамлакатларидан келган спортчилар бош мукофот учун дона суришяпти. 

Тошкент Опен турнири швейцарча тизимда 9 турдан иборат бўлиб, кеча тўртинчи тур учрашувлари ўтказилди. Халқаро мастер Нодирбек Ёқуббоев (2569) Валерий Казаковский билан дуранг ўйнади. Яна бир истеъдодли шахматчимиз Шамсиддин Воҳидов эса қора доналарда ҳаракат қилишига қарамай, Вахе Даниляндан устун келди. 

Бугун ўтказилаётган 5-тур олдидан мусобақа жадвалида эронлик халқаро гроссмейстер Амирризо Поуррамезанали, бразилиялик гроссмейстер Александр Фиер ҳамда Шамсиддин Воҳидов 3,5тадан очко жамғариб, қўшҳокимлик қилишяпти. Шамсиддин қўшимча кўрсаткичларга кўра 3-ўринни банд этган. Уч очкога эга Нодирбек Ёқуббоев эса 4-поғонадан жой олган. 

Ўзбекистонлик шахматчилардан Хайрулла Тўраев, Сарвиноз Қурбонбоева, Абдумалик Абдусалимов ва Улуғбек Тиллаев ҳисобида ҳам 3 очко бор. Бугун икки ёш шахматчимиз халқаро гроссмейстерларга қарши дона суришади. Шамсиддин Амирризо Поуррамезанали, Нодирбек эса Александр Фиер билан ҳисоб-китоб қилади. 

Маълумот учун, анъанавий тарзда ўтказиб келинаётган халқаро турнирнинг мукофот жамғармаси 20 000 АҚШ долларини ташкил қилади. Асосий гуруҳда биринчи ўринни эгаллаган шахматчи 3 000 долларга эга бўлади.