Tashkent Open. Нодирбек ва Шамсиддин пешқадамлар сафида!

Республика ихтисослаштирилган болалар-ўсмирлар шахмат мактаби мезбонлик қилаётган мусобақада юртимиз шахматчиларидан ташқари Россия, Бразилия, Беларусь, Озарбайжон, АҚШ, Эрон, Марказий Осиё мамлакатларидан келган спортчилар бош мукофот учун дона суришяпти. 

Тошкент Опен турнири швейцарча тизимда 9 турдан иборат бўлиб, кеча иккита тур учрашувлари ўтказилди. Халқаро мастер Нодирбек Ёқуббоев (2569) оқ доналарда терма жамоа мураббийи Акмал Файзуллаевни мағлубиятга учратди. Учинчи турда қора доналарда ҳаракат қилиб, россиялик халқаро гроссмейстер Сергей Иванов билан муросага келди. 

Яна бир истеъдодли шахматчимиз Шамсиддин Воҳидов ҳам мағлубиятсиз одимлаяпти. У 3та учрашувда икки ғалаба ва бир дуранг қайд этди. У учинчи партияда беларуслик халқаро гроссмейстер Алексей Фёдоров билан муросага келди. Иккинчи турда Сарвиноз Қурбонбоевани таслим этган эди. 

Бугун ўтказилаётган 4-тур олдидан мусобақа жадвалида эронлик халқаро гроссмейстер Амирризо Поуррамезанали ва бразилиялик Александр Фиер 3тадан очко жамғариб пешқадамлик қилишяпти. Нодирбек Ёқуббоев 2,5 очко билан қўшимча кўрсаткичларга кўра 3-ўринни банд этган. Шунча очкога эга Шамсиддин Воҳидов 7-поғонадан жой олган. 

Маълумот учун, анъанавий тарзда ўтказиб келинаётган халқаро турнирнинг мукофот жамғармаси 20 000 АҚШ долларини ташкил қилади. Асосий гуруҳда биринчи ўринни эгаллаган шахматчи 3 000 долларга эга бўлади.