Tashkent Open XII. 17 ёшли Ниғматов шов-шувли тарзда биринчи рақамли гроссмейстерни енгди

Мусобақада 12 мамлакатдан келган шахматчилар ғолиблик йўлида ўзаро рақобатлашишяпти. Ўз тарихида ўн иккинчи бор ўтказилаётган халқаро турнирнинг соврин жамғармаси 20 000 АҚШ долларини ташкил қилади. Ғолиб шахматчи 3 000 долларга эга бўлади. 

Беларуслик халқаро гроссмейстер Кирил Ступак (2556) турнирнинг биринчи рақамли шахматчиси ҳисобланади. Кеча у бешинчи турда ўзи сингари 4та партиянинг барчасида ғалабага эришган ёш шахматчимиз Ортиқ Ниғматовга қарши дона сурди. 

Ниғматов кучли рақибига қарши қора доналарда ўйнашига қарамай, ғалаба қозонишга муваффақ бўлди. Ступак ўтган йилги турнирда иккинчи ўринни эгаллаган эди. Бу ўзига хос тарихий ғалабадан сўнг Ортиқ Ниғматов 5 очко билан якка пешқадам бўлиб олди. 

Халқаро мастер Нодирбек Ёқуббоев ҳам бу турда ғалабага эришди. Ёш шахматчимиз россиялик Илья Дужаковдан устун келди. Ёқуббоев ушбу ғалабаси эвазига турнир жадвалида 4,5 очко билан иккинчи ўринга кўтарилиб олди. Яна бир ҳамюртимиз Саидакбар Сайидалиев қора доналарда ўйнаб, россиялик халқаро гроссмейстер Евгений Левин билан муросага келди. 

Бугун олтинчи турда Ниғматов ва Ёқуббоев ўзаро муносабатларига ойдинлик киритиб олишади. Тўрт очкога эга бўлиб турган Гулруҳбегим Тоҳиржонова оқ доналарда Кирил Ступакка қарши дона суради.