“Tashkent Open XII”. Тўрт нафар шахматчимиз етакчилар сафида

Мусобақада 12 мамлакатдан келган шахматчилар ғолиблик йўлида ўзаро рақобатлашишяпти. Ўз тарихида ўн иккинчи бор ўтказилаётган халқаро турнирнинг соврин жамғармаси 20 000 АҚШ долларини ташкил қилади. Ғолиб шахматчи 3 000 долларга эга бўлади. 

Беларуслик халқаро гроссмейстер Кирил Ступак (2556) турнирнинг биринчи рақамли шахматчиси ҳисобланади. Кеча учинчи тур учрашувлари ўтказилди. Ҳозирча етти шахматчи юз фоизлик натижага эга бўлиб турибди. Улар орасида тўрт нафар ҳамюртимиз ҳам бор. 

Ўтган йилги турнирда иккинчи ўринни эгаллаган Ступак 3-турда тожикистонлик Муҳаммад Ҳусанхўжаевни мағлубиятга учратди. Ёш шахматчимиз Ортиқ Ниғматов кетма-кет учинчи ғалабасига эришди. Бу сафар у испаниялик халқаро гроссмейстер мусобақанинг иккинчи тартиб рақамли шахматчиси Олег Корнеев (2546)дан устун келди. 

Ҳамюртларимиздан Саидакбар Сайидалиев қора доналарда ўйнашига қарамай, эронлик халқаро гроссмейстер Амирризо Пуррамезаналини мағлубиятга учратди. Яна бир ёш шахматчимиз Никита Хорошев қора доларада ўйнаб, беларуслик халқаро гроссмейстер Владимир Малахаткони доғда қолдирди. Шамсиддин ва Жаҳонгир Воҳидовлар партиясида дуранг натижа қайд этилди. 

Ҳамюртларимиздан Ортиқ Ниғматов қўшимча кўрсаткичларга кўра иккинчи ўринни эгаллаб турибди. Пешқадам Кирил Ступак ҳисобида ҳам 3 очко бор. Нодирбек Ёқуббоев, Саидакбар Сайидалиев ва Никита Хорошев ҳозиргача ўтказилган 3та партияда ғалаба қозонишган. Бугун 4-турда Сайидалиев карвонбоши Ступакка қарши оқ доналарда ҳаракат қилади.