Tata Steel Chess-2025. Абдусатторов ғалаба эвазига пешқадам бўлиб олди

Нуфузли турнирнинг "Мастерс" гуруҳида Нодирбек Абдусатторов, "Челленжер" гуруҳида эса Нодирбек Якуббоев совринли ўринлар учун баҳс олиб боряпти. Кеча ўтказилган учинчи тур баҳсида Абдусатторов қаторасига иккинчи ғалабасини тантана қилди. У қора доналарда ўйнашига қарамай, мезбон шахматчи Макс Вармердамни мағлубиятга учратди. 

Қувонарлиси, Нодирбек 1 дуранг ва 2 ғалаба билан 2,5 очко тўплаган ҳолда қўшимча кўрсаткичларга кўра пешқадамликни қўлга олди. Ҳамюрти Аржун Эргаисини таслим эта олган ҳиндистонлик Рамешбабу Прагнанандҳа ҳам ўз очколарини 2,5 тага етказиб олди. Учинчи турнинг марказий партиясида ҳиндистонлик Гукеш Доммараджу америкалик Фабиано Каруана билан муросага келди. 

Афсуски, "Челленжер" гуруҳида қатнашаётган Нодирбек Якуббоев 3-турда мағлубият аламини тотиб кўрди. У Чехия шарафини ҳимоя қилаётган Нгуен Тай Дай Ванга ютқазиб қўйди. Якуббоев 1,5 очко билан қўшимча кўрсаткичларга кўра 7-ўринни эгаллаб турибди.