Tata Steel Chess-2025. Икки Нодирбекда ғалаба, Абдусатторов яна пешқадам бўлиб олди

Нуфузли турнирнинг "Мастерс" гуруҳида Нодирбек Абдусатторов, "Челленжер"ида эса Нодирбек Якуббоев совринли ўринлар учун баҳс олиб боряпти. Кеча ўтказилган бешинчи тур баҳсида Абдусатторов қора доналарда ўйнашига қарамай, мезбонлар вакили Йорден Ван Форестни мағлубиятга учратди. Нодирбек 3 ғалаба ва 2 дуранг билан 4 очко жамғарган ҳолда яна қўшимча кўрсаткичларга кўра пешқадамга айланиб олди. 

Биринчи турда Абдусатторов билан дуранг ўйнаганидан кейин кетма-кет учта партияда ғалаба қозонган ҳиндистонлик Рамешбабу Прагнанандҳа кеча очко йўқотди. У яна бир нидерландиялик гроссмейстер Макс Вармердам билан муросага келди. Рамешбабу 4 очко билан қўшимча кўрсаткичларга кўра 2-ўринга жойлашган. Америкалик Фабиано Каруана бироз кутилмаганда Владимир Федосеевга имкониятни бой бериб қўйди. Ҳиндистонлик Гукеш Доммараджу германиялик Винсент Кеймердан устун келди. 

Қувонарлиси, "Челленжер" гуруҳида қатнашаётган Нодирбек Якуббоев ҳам ниҳоят 5-турда ғалабага эришди. У қора доналарда ўйнашига қарамай, озарбайжонлик Айдин Сулейманлини мағлубиятга учратиб, очколарини 2,5 тага етказиб олди. Якуббоев қўшимча кўрсаткичлар бўйича 10-поғонадан 8-ўринга кўтарилди. Нидерландиялик Эрвин Л`ами 4 очко билан якка пешқадам бўлиб олган.