Tata Steel Chess 2026. Абдусатторов ҳам, Синдаров ҳам 4-турда ғалаба қозониб, кучли учликка кирди

Турнирнинг кучлилар жам бўлган "Мастерс" гуруҳида дунёнинг етакчи 14 нафар гроссмейстери қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳс олиб боряпти. 

Қувонарлиси, кеча ўтказилган 4-турда ҳар икки гроссмейстеримиз рақибларини мағлуб этишни уддалашди. Нодирбек Абдусатторов оқ доналарда чехиялик Тай Даи Ван Нгуэнни, Жавоҳир Синдаров эса қора доналарда ўйнаганига қарамай, германниялик Маттиас Блубаумни мағлубиятга учратди.

Tata Steel Chess турнирининг амалдаги чемпиони, ҳиндистонлик Рамешбабу Праггнанандҳа бу турда амалдаги жаҳон чемпиони Гукеш Доммараджу билан муросага келди. Америкалик Ханс Мок Ниеменн қора доналарда ҳиндистонлик Аравиндх Читамбарамни мағлуб этишни уддалади. 

Тўртинчи турдан сўнг айна Ниеманн 3 очко билан турнир жадвалида қўшимча кўрсаткичларга кўра биринчи ўринни эгаллаб турибди. Нодирбек Абдусатторов ҳислбида ҳам 3 очко бор ва у қўшимча коэфицентларга кўра иккинчи ўринни банд этган. У икки ғалаба ва икки дуранг қайд этган. Учта учрашувда дуранг, биттасида зафар қучган амалдаги Жаҳон кубоги соҳиби Жавоҳир Синдаров эса 2,5 очко билан қўшимча коэфицентларга кўра 11-поғонадан 3-ўринга кўтарилиб олди. 

Tata Steel Chess 2026. 4-тур натижалари:

Нодирбек Абдусатторов (Ўзбекистон) — Тай Даи Ван Нгуэн (Чехия) 1-0

Аниш Гири (Нидерландия) — Аржун Эригаиси (Ҳиндистон) 0,5-0,5

Маттиас Блубаум (Германия) — Жавоҳир Синдаров (Ўзбекистон) 0-1

Аравиндх Читамбарам (Ҳиндистон) — Ханс Ниеманн (АҚШ) 0-1

Гукеш Доммаражу (Ҳиндистон) — Рамешбабу Прагнанандха (Ҳиндистон) 0,5-0,5

Владимир Федосеев (Словения) — Йорден ван Форест (Нидерландия) 0,5-0,5

Ягиз Каан Эрдогмуш (Туркия) — Винсент Кеймер (Германия) 0,5-0,5  

Бугун мусобақада 5-тур учрашувлари ўтказилади ва бизнинг вақт билан одатдагидек соат 18:00да бошланади. Унда Нодирбек Абдусатторов қора доналарда америкалик Ханс Мок Ниеманнга қарши баҳс олиб боради. Жавоҳир Синдаров эса оқ доналарда туркиялик 14 ёшли гроссмейстер Ягиз Каан Эрдогмуш билан ҳисоб-китоб қилади.