Tata Steel Chess 2026. Бугун Нидерландияда ўзбек дербиси бўлиб ўтади

Турнирнинг кучлилар жам бўлган "Мастерс" гуруҳида дунёнинг етакчи 14 гроссмейстери қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳс олиб боряпти. Бугунги тур олдидан Нодирбек 5,5 очко билан биринчи, 5 очкога эга Жавоҳир эса иккинчи ўринни эгаллаб турибди.  

Эътиборлиси шундаки, бугун ўтказиладиган 9-турда ўзбек дербисига гувоҳ бўламиз. Унда Синдаров оқ доналарда Абдусатторовга қарши баҳс олиб боради. Ғалаба қозонган тақдирда Жавоҳир 6 очко билан пешқадамга айланиб олиши мумкин. Дуранг ҳолатда шахматчиларимиз биринчи ва иккинчи ўринларини сақлаб қолишади.  

Бир йўла уч иштирокчи - Ҳанс Ниеманн (АҚШ), Ягиз Каан Эрдогмуш (Туркия) ва Йорден ван Форест (Нидерландия) 4,5 очкодан жамғариб, Топ-5`га якун ясаб турибди. Бугунги учрашувлар бизнинг вақт билан соат 18:15да бошланади.