Tata Steel Chess 2026. Синдаровда кетма-кет ғалаба, ҳар икки гроссмейстеримиз пешқадамлар сафида

Турнирнинг кучлилар жам бўлган "Мастерс" гуруҳида дунёнинг етакчи 14 нафар гроссмейстери қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳс олиб боряпти. 

Қувонарлиси, кеча ўтказилган 5-турда Жавоҳир Синдаров кетма-кет иккинчи ғалабасини қўлга киритди. У оқ доналарда ҳаракат қилиб, дунёнинг энг ёш тўртинчи гроссмейстери, туркиялик 14 ёшли Ягиз Каан Эрдогмушни чиройли усулда мағлубиятга учратди. Нодирбек Абдусатторов эса бу турда қора доналарда мусобақа пешқадами америкалик Ханс Мок Ниеменн билан дуранг ўйнади. 

Tata Steel Chess турнирининг амалдаги чемпиони, ҳиндистонлик Рамешбабу Праггнанандҳа бу турда мезбонлар вакили Аниш Гири билан муросага келди. Амалдаги жаҳон чемпиони Гукеш Доммараджу эса қора доналарда ўйнаганига қарамай, Чехия шарафини ҳимоя қилаётган Тай Даи Ван Нгуэнни таслим этди. Бу чех шахматчиси бундан олдинги турда Нодирбекка ҳам ютқазганди. 

Бешинчи турдан сўнг Ҳанс Ниеманн, Жавоҳир Синдаров ва Нодирбек Абдусатторов 3,5 очкодан жамғариб, кучли учликни банд этиб туришибди. Ҳанс қўшимча кўрсаткичларга кўра 1-ўринда қолмоқда. Синдаров иккинчи ўринга кўтарилган бўлса, Нодирбек Абдусатторов учинчи поғонадан жой олган. Владимир Федосеев Гукеш Доммараджу ва Йорден ван Форест ҳисобида 3 очкодан бор. 

Tata Steel Chess 2026. 5-тур натижалари:

Жавоҳир Синдаров (Ўзбекистон) — Ягиз Каан Эрдогмуш (Туркия) 1-0

Винсент Кеймер (Германия) — Аравиндх Читамбарам (Ҳиндистон) 1-0  

Рамешбабу Прагнанандха (Ҳиндистон) — Аниш Гири (Нидерландия) 0,5-0,5

Ҳанс Ниеманн (АҚШ) — Нодирбек Абдусатторов (Ўзбекистон) 0,5-0,5

Йорден ван Форест (Нидерландия) — Маттиас Блубаум (Германия) 0,5-0,5

Аржун Эригаиси (Ҳиндистон) — Владимир Федосеев (Словения) 0-1

Тай Даи Ван Нгуэн (Чехия) — Гукеш Доммаражу (Ҳиндистон) — 0-1

Бугун мусобақада дам олиш куни сифатида эълон қилинган. Эртага, 23 январь куни ўтказиладиган 6-турда Нодирбек Абдусатторов оқ доналарда амалдаги жаҳон чемпиони Гукеш Доммараджу билан ҳисоб-китоб қилади. Жавоҳир Синдаров эса қора доналарда мусобақани омадсиз ўтказаётган ҳиндистнонлик Аравиндх Читамбарамга қарши баҳс олиб боради.