Tata Steel Chess. Абдусатторовда муҳим ғалаба, Гукеш ҳам тўхтамаяпти, Якуббоевда дуранг (ФОТО+ЖАДВАЛ)

Кеча ўтказилган 10-турда "Мастерс" гуруҳи пешқадамлари сафида бораётган Нодирбек Абдусатторов оқ доналарда ўйнаб, сербиялик Алексей Саранага мусобақадаги илк мағлубиятни тақдим этди. Абдусатторов бу ғалаба эвазига 7 очко билан турнир жадвалида соф иккинчи ўринни ўзиники қилиб турибди. 

Пешқадам Гукеш Доммараджу ҳам тўхтамаяпти. Амалдаги жаҳон чемпиони қора доналарда ҳаракат қилганига қарамай, нидерландиялик Макс Вармердамдан устун келди. Гукеш 7,5 очко билан якка карвонбоши бўлиб турибди. Яна бир ҳинд гроссмейстери Рамешбабу Прагнанандҳа ҳам бу турда ўзи учун муҳим ғалабани қўлга киритди. У словениялик Владимир Федосеевдан устун келиб, 6,5 очко билан кучли учликка якун ясаган. 

"Мастерс" гуруҳида мағлубиятга учрамаган уч нафар шахматчи қолди - Гукеш Доммараджу, Нодирбек Абдусатторов ва Вей И. Хитойлик гроссмейстернинг 1 ғалаба, 9 та дуранг қайд этганига эътиборга молик ҳолат. Гукеш ҳисобида 5 тадан ғалаба ва дуранг бор. Абдусатторов эса 4 ғалаба ва 6 дурангга эга.

"Челленжер" гуруҳида қатнашаётган Нодирбек Якуббоев (2659) 10-турда оқ доналарда нидерландиялик Бенжамин Бок билан муросага келди. Якуббоев 3 ғалаба, 4 дуранг ва 3 мағлубият билан 5 очко жамғарган ҳолда турнир жадвалида 9-поғонадан жой олган. 

Чехиялик Ван Нгуен 7,5 очко билан "Челленжер" гуруҳида якка карвонбошилик қиляпти. Нидерландиялик Эрвин Л`ами 7 очко тўплаб, 2-ўринни банд этган бўлса, озарбайжонлик Айдин Сулейманли 6,5 очко билан қўшимча кўрсаткичларга кўра кучли учликка якун ясаган. Бенжамин Бок ҳисобида ҳам 6,5 очко бор.