Tata Steel Chess India. Нодирбек Абдусатторов блиц мусобақасининг илк кунини қандай ўтказди?

Ўз тарихида олтинчи бор ўтказилаётган нуфузли мусобақанинг мукофот жамғармаси 41 500 АҚШ долларини ташкил этади. Бугун турнирининг блиц баҳслари старт олди ва гроссмейстерлар 9 та турда ҳисоб-китоб қилишди. Нодирбек Абдусатторов рапид турнирида 5 очко билан 4-ўринни банд этганди. 

Бугунги блиц баҳслари у учун омадсиз бошланди. Ҳамюртимиз аввалига Даниил Дубов (FIDE) билан дуранг ўйнади. Кейин эса кетма-кет 4 та турда рақибларига имкониятни бой берди. Аржун Эригаиси, Видит Гужратҳи ва Рамешбабу Праггнанандҳаа (уччаласи ҳам Ҳиндистон) ва Магнус Карлсен Нодирбекни таслим этди. 

Кейин эса ғалабали серия бошланди. Абдусатторов Уэсли Со (АҚШ), Сунилдут Лина Нараянан (Ҳиндистон) ва Винсент Кеймер (Германия)дан устун келиб, вазиятни бирмунча ижобий томонга ўзгартирди. Бугун учун белгиланган сўнгги 9-турда эса Ниҳал Сарин (Ҳиндистон) билан муросага келди. 

Шу тариқа, Нодирбек Абдусатторов блиц турнирининг биринчи кунги баҳсларини 4 очко билан якунлади. У турнир жвадвалида 6-ўринни эгаллаб турибди. Рапид турнири чемпиони Магнус Карлсен 6,5 очко билан якка пешқадам бўлиб олди. Рамешбабу 6 очко билан иккинчи ўринни банд этган бўлса, Аржун Эргаиси 5,5 очко билан кучли учликка якун ясаган. 

Эртага шахматчилар яна 9 та турда ўзаро муносабатларига ойдинлик киритиб олишади.