Тавсия қиламиз! Алига қадар энг кучли бўлган, йилига ўртача 20 та жанг ўтказган, бир йилда 45 жанг ўтказиб барчасида ғалаба қозонган боксчи ҳақида

У 1919 йилда ХХ аср вабоси "испан" вируси тарқалган вақтда, йил давомида 45 та жанг ўтказиб, барчасида ғалаба қозонган. Умуман олганда, Греб 13 йиллик фаолияти давомида 298 та баҳсда иштирок этган, бу дегани йилига ўртача 23 жангда Гарри рингга кўтарилган. Айнан америкалик боксчи Муҳаммад Алига қадар бокс тарихидаги энг кучли боксчи ҳисобланган.

Гарри 1913 йилда қурилишда ишлаб ҳафтасига 12 доллар топган, бир неча йил ўтиб эса — 650 доллар.

Боксчининг ҳаёти жуда қизиқ. У рингда улкан натижаларга эришган бўлишига қарамай, унинг ҳаёти ҳақида деярли маълумотлар йўқ. Греб 1894 йилда Питтсбургда немис мигрантлари оиласида дунёга келган. У фаолиятининг илк даврларида қурилишда ишлаб, ҳафтасида 12 доллар олган. Ўн саккиз ёшга кирганида эса йилига 33 минг доллар ишлаб топишга эришган. Гарри ҳаваскор боксда иштирок этмаган ва тўғридан-тўғри профессионал боксчи бўлиб етишган. ХХ аср бошларида бокс умуман бошқача бўлган ва шу сабабдан Габрига қарши ким жанг қилишни истаса, ўша рингга чиқаверган. У панчер ҳисобланмаган, лекин қўл тезлиги эвазига рақибларини доим қийин ҳолатга солишни уддалаган. Шунингдек, ҳозирги вақтда тақиқланган усул - тирсак зарбасидан ҳам унумли фойдаланган.

«Испан» вируси тарқалган вақтда у ҳар ҳафта жанг ўтказган, бундай боксчи ҳозир дунёда йўқ!

Биринчи жаҳон уруши якунланганидан сўнг инсоният бошига яна бир офат - «Испан» вируси келиб тушди. 18 ой ичида касалланганлар сони 550 миллионга етди, бу ўша давр аҳолисининг 30 фоизи дегани эди. Вирусдан 50-100 миллион одам ўлгани тахмин қилинган. Бу давр оралиғида Греб жами 45 та жангда иштирок этди. У иштирокидаги жангларининг муддати ўртача бир ҳафтани ташкил этган, баъзида эса 3 кунда иккита рақибга қарши ҳам жангларда иштирок этган. У икки вазнда - ўрта ва ярим оғир вазнлардаги жангларда рингга чиққан. Кўпинча рақибларининг гавда тузилиши катта бўлган. Лекин бу унга ҳеч қандай муаммо туғдирмаган ва рақибларининг барчасини таслим этишни уддалаган.

Унинг юлдузли онлари 1922 йилнинг 23 май кунига тўғри келади. Айнан ўша куни Греб “Madison Square Garden”да Жин Танни мағлуб этиб, Америка чемпионлик камарига эга бўлади. Бу жанг The Ring талқини бўйича «Йил жанги» совринини қўлга киритади.

Жиннинг бу мағлубияти фаолиятидаги дастлабки ва охиргиси бўлади. Шундан сўнг яна уч бор ўзаро рингда тўқнаш келишади.

Бокс афсонаси фаолиятидаги сўнгги жангини 1926 йилнинг августида ўтказади ва очколар ҳисобига кўра Тайгер Глауресга имкониятни бой бериб қўяди. Жангда олинган жароҳат Гаррининг шифокорларга мурожаат қилишига мажбур этади. Унинг жуда қисқа вақт оралиғида жанг қилишлари салбий таъсир кўрсатади ва 1926 йилнинг 22 октябрида, 32 ёшида Гарри Греб бу ёруғ оламни тарк этди.

У 1990 йилда биринчилардан бўлиб Халқаро шон-шараф залига киритилган.

2006 йилда Халқаро бокс тадқиқот ташкилоти Гребни барча даврларнинг энг яхши иккинчи боксчи деб эълон қилди.

Умуман олганда, Греб фаолияти давомида 298 та жангда иштирок этиб, 261 тасида ғалаба қозонган, 17 та жангда мағлуб бўлган бўлса, яна 20 та жангда дуранг қайд этилган.

Ниғмонхўжа НОЗИМОВ тайёрлади