ТАВСИЯ ҚИЛАМИЗ: UFC'нинг янги қироли - Топурия! У ваъдасини бажарди ва Волкановскини нокаут қилди!

Оқшомнинг марказий баҳсида ярименгил вазн тоифаси чемпиони Алекс Волкановски ўз камарини даъвогар Илия Топуриядан ҳимоя қилиши керак эди.

Волкановски ўтган йилни енгил ва ярименгил вазн тоифаларида ўтказди. Енгил вазнда Ислам Махачев билан тўқнаш келди, бироқ иккаласида ҳам енгилди ва сўнгги жангда австралиялик UFC'даги илк нокаутли мағлубиятини қабул қилиб олди. Ёддан чиқмас мағлубиятдан атиги тўрт ой ўтиб чемпионликни ҳимоя қилишга ростдан ҳам тайёрми ёки йўқми деган шубҳалар пайдо бўлди. Тўғри, ўз вазнида Алекс ҳали ҳам енгилмас эди. Топурия билан жангдан олдин у беш марта чемпионликни ҳимоя қилган. Охирги ҳимоя ўтган йилнинг июль ойида бўлди ва ўша жангда Волкановски Яир Родригесни нокаутга учратди.

Илия Топурия - мағлубиятсиз, 14-0 ҳисобида профессионал рекордни қўлга киритган, шулардан олтитаси UFC'даги ғалаба. Охирги жангда Илия фахрий Жош Эмметт устидан ғолиб бўлди, ҳаттоки, ҳакамлардан бири ҳисобни 50-42 кўрсатди. Ғалаба испаниялик грузинни рейтингда учинчи ўринга олиб чиқди ҳамда чемпионлик учун курашиш имкониятини тақдим этди. Жанг олдидан Топурия унинг даври бошланаётгани ҳақида кўп гапирди, матбуот анжуманида у Конор Макгрегорнинг ғалати гапларини такрорлади ва биринчи раундда нокаутга ваъда бериб, жангни ҳар томонлама тарғиб қилди. Волкановский эса, ўз навбатида, такаббур йигитга камтарлик сабоғини бериш билан таҳдид қилди.

Топурия октагон марказини эгаллаб олди. Волкановски турли қаватлардан зарбалар йўллай бошлади. Илия кескин ҳужумларсиз олдинга ўтди, лекин унинг лоу-киклари жуда хавфли эди. Раунд охирига келиб бир нечта аниқ зарбалар берди, аммо жиддий зарар етказмади. Бир нарса аниқ - Илия ўзининг таниқли рақибини анчагина хавотирга солди.

Иккинчи раунднинг бошида Топурия томонидан яна бир қанча хавфли зарбалар бўлди ва Волкановски асосан узоқдан оёқлари билан ишлашни давом эттирди, лекин яхшигина таъсир қилган жеб ҳам ишлатди. Бироқ, Алекс кучли зарбани ўтказиб юборди. Топурия октагон тўрига бир нечта зарбалар берди, улардан бири австралияликни нокаутга учратди!

Волкановски узоқ вақт давомида UFC ярименгил вазн тоифасида етакчилик қилди, беш марта чемпионликни ҳимоя қилган, аммо янги рақибнинг қаршилигига дош бера олмади. Илия Топурия - янги чемпион ва промоушеннинг янги юлдузи!

Сарвиноз Рахмонқулова тайёрлади