14 май 19:40
Янгиликлар

Бокс/ММА

Тайсон Фьюри: "Жошуа эскилик сарқити"

Супероғир вазн тоифасида собиқ жаҳон чемпиони Тайсон Фьюри ҳамюрти, WBA, WBO ва IBF йўналишлари чемпиони Энтони Жошуани эскилик сарқити деб атади.

Фьюрининг сўзларига қараганда, Жошуа ҳамон эскича фикрлайди, кучсиз рақиблар билан жанг ўтказиб, ўзини дивизионнинг энг кучли боксчиси деб ҳисоблайди. Бу эса мухлисларнинг жонига теккан.

“Жошуа қотиб қолган. У замон ўзгараётганидан бехабар. Энтони катта жанглардан ўзини олиб қочяпти. Мухлислар эски пластинкани эшитавериб чарчашди. Шундай экан, ўзингда кучли рақиб билан жанг қилишга куч топа ол, сенга довюрак бўлишни тилайман”, - дея Фьюрининг сўзларидан иқтибос келтирмоқда The Independent.

Эслатиб ўтамиз, Тайсон Фьюри яқинда Top Rank промоутерлик компанияси ҳамда ESPN телеканали билан шартнома имзолаган эди. Ҳамкорликдаги илк жанг 15 июнь куни АҚШнинг Лас-Вегас шаҳрида бўлиб ўтади. Тайсон Фьюри шу куни Том Шварцга қарши рингга кўтарилади.