Tbilisi Grand Slam. Бозоров олтин, Қодирова бронза медали учун татамига чиқади

Қувонарлиси, Ўзбекистон чемпионатининг амалдаги бронза медали совриндори Умар Бозоров (-90 кг) фаолиятидаги илк халқаро мусобақасидаёқ шоҳсупага кўтариладиган бўлди. У финалгача IJF байроғи остидаги Явор Варапеу, грузиялик Сосо Эбилашвили, венгриялик Петер Сафрани, нидерландиялик Марк Ван Дийкни мағлубиятга учратди. Энди у олтин медаль учун жаҳон рейтингида 24-ўринни эгаллаб турган фарнциялик Алексис Матьёга қарши татамига чиқади.   

Яна бир дзюдочимиз Барчиной Қодирова эса турнирнинг бронза медали учун баҳс олиб боради. -78 кг вазндаги вакиламиз бронза медали йўлидаги ўтиш беллашувида литвалик Юлия Дунайтедан устун келди. Унинг бронза медали учун кечадиган учрашувдаги рақибаси жаҳон рейтингида 6-ўринда бораётган португалиялик Патрициа Сампайо бўлади.