Теннис янгиликлари: Султонов Almaty Open 250 саралашидан ўта олмади, Фомин эса Италия Челленжерининг саралашида иштирок этмоқда

Мамлакатимизнинг биринчи ракеткаси Ҳумоюн Султонов кеча Қозоғистоннинг Олма-Ота шаҳрида ўтказилаётган Almaty Open 250 турнири саралашининг илк босқичи доирасида кортга чиқди. Унга Қозоғистон вакили Михаил Кукушкин рақиблик қилди.

1 соат, 24 дақиқа давом этган баҳсда Кукушкин 2:0 (6/4, 6/4) ҳисобида ғалаба қозонди. Таққослаш учун, Михаил айни дамда ATP рейтингида 103, Султонов эса 237-ўринни эгаллаб турибди.

Ўзбекистоннинг иккинчи рақамли теннисчиси Сергей Фомин эса шу кунларда Италиянинг Ольбио шаҳрида ўтказилаётган Челленжер мусобақаси саралашида ўз омадини синаб кўряпти. У кеча илк ўйинда италиялик Федерико Саламон (ATP-2109) устидан ортиқча қийинчиликсиз ғалаба қозонди. 1 соат, 7 дақиқа давом этган беллашувда Сергей 2:0 (6/4, 6/1) ҳисобида ғалабани ўзиники қилди.

Фомин бугун квалификация финали доирасида словениялик Милош Карольга қарши кортга чиқади. 

Маълумот учун, айни дамда 23 ёшли Сергей Фомин ATP рейтингида 534-ўринни эгаллаб турган бўлса, 21 ёшли Милош Кароль 612-ўринда қайд этилган.