Теннисчи қизларимиз "Билли Жин Кинг кубоги"ни муваффақиятли бошлашди

Аввал хабар берганимиздек, мусобақада Ўзбекистон аёллар теннис терма жамоаси ҳам иштирок этмоқда.

11 та жамоадан иборат Осиё-Океания II гуруҳи учта кичик гуруҳга бўлинган ҳолда ташкил этилмоқда. Ўзбекистон терма жамоаси қуръа натижаларига кўра, C гуруҳидан ўрин олган. У ерда вакилаларимизга мезбон Малайзия, Қирғизистон ва Шри-Ланка термалари рақиб бўлади.

Таркибимизда Дарья Шубина, Сабрина Олимжонова, Мафтунабону Қаҳрамонова, Шаҳноза Маримова ҳамда Злата Чиннова бор, тажрибали Оқгул Омонмуродова эса жамоа сардори.

Кеча терма жамоамиз гуруҳдаги илк ўйинини Шри-Ланкага қарши ўтказди. Яккалик баҳсларида Сабрина Олимжонова Разик Сажидани (6:0, 6:3), Дарья Шубина Рукшика Вижесорияни (6:2, 6:2) ҳисобида таслим этди. Жуфтлик беллашувида эса Мафтуна Қаҳрамонова/Шаҳноза Маримова тандеми Динара Де Сильва/Тувини Де Альвис жуфтлигидан устун келди (6:1, 6:3).

Шу тариқа, теннисчиларимиз илк баҳсда Шри-Ланкани 3:0 ҳисобида мағлуб этиб, гуруҳ пешқадамига айланди.  Иккинчи беллашувда Малайзия қўшниларимиз — қирғизистонликларни 2:1 ҳисобида енгди.

Бугун термамиз айнан Қирғистонга қарши кортга чиқади.