Терма жамоа бош мураббийи карантинни қандай ўтказмоқда?

Хабарингиз бор, коронавирус пандемияси сабаб юзага келган ҳозирги карантин ҳолатида давлат ва нодавлат жамоат ташкилотлари, турли муассасалар ўз иш фаолиятларини масофавий тарзда олиб боришяпти. Барчамиздан уйда қолиш сўралмоқда. Зеро, фақат шу йўл орқалигина тезроқ коронавирус балосидан қутулиш мумкин.  

Хусусан, Ўзбекистон спорт курашлари ассоциациясида ҳам иш тўхтаб қолгани йўқ. Бугунги ахборот технологиялари яшин тезлигида тараққий этиб бораётган замонамизда ассоциация раҳбарияти, ходимлар, мураббийлар фаолияти масофадан туриб давом эттириляпти. 

Жумладан, юнон-рим кураши бўйича Ўзбекистон катталар терма жамоаси бош мураббийи Равшан Рўзиқулов ҳам ассоциациянинг катта оиласи учун очилган махсус телеграм каналида спортчиларимизнинг кунлик ҳолатини назорат қилиб боряпти. 

"Терма жамоа аъзоларига уй шароитида ўтказиладиган махсус машғулотлар бериб боряпмиз. Шифокорлар ҳар куни икки маҳал курашчиларимизнинг саломатлиги, тана ҳарорати, қон босимини назорат қилишяпти. Барча ишлар масофавий тарзда олиб бориляпти. Карантин ҳам биз учун бир синов. Ўзим оилам даврасида кунларни мазмунли ўтказиш учун ҳаракат қиляпман. Фарзандларим билан турли ўйинлар ўйнаяпмиз. Енгил машғулот ўтказяпмиз. Масофавий йўлга қўйилган мактаб дарсларини биргаликда бажаряпмиз. Фурсатдан фойдаланиб, азиз ҳамюртларимизни уйда қолишга, зарурат бўлмаса кўчага чиқмасликка чақираман", - дейди Равшан Рўзиқулов.