Терма жамоага номзодлар сараланади

Олмалиқнинг ОТМК жамоаси 14 очко, Ўзбекистон ёшлар миллий терма жамоаси Тошкент шаҳри 12 очко, Андижон ИОЗМИ 10 очко хамда Самарқанднинг Булунғур жамоаси 8 очко билан пешқадамлар сафида бормоқдалар.

8 та жамоа иштирокида ўтаётган мазкур чемпионатда 2000-2001 йилларда туғилган қизлардан иборат Ўзбекистон терма жамоаси Мўғулистонда ўтказиладиган қитъа биринчилиги – Халқаро “Трофи кубоги” беллашувларига тайёргарлик кўриш мақсадида конкурсдан ташқари иштирок этмоқда.

 - Чемпионат баҳслари тўрт даврадан иборат бўлади, - дейди Ўзбекистон гандбол федерацияси ижрочи директори Мидхат Бикметов. – Биринчи давра Олмалиқда ўтказилган эди. Самарқандда ўтказилаётган баҳслар ҳам юқори савияда ташкил этилмоқда. Мусобақанинг 3-давра баҳслари Наманганда, якуний 4-давра Тошкент шаҳрида ўтказилади.

Бундан мақсад жамоаларга қулайлик яратиш ва жойларда мазкур спорт турини оммалаштиришдан иборат. Ушбу мусобақа мамлакат терма жамоаси аъзолари ҳолатини аниқлаш ва янги номзодларни саралаш имконини беради. Чунки жорий йилнинг сентябрь-октябрь ойларида аёллар терма жамоаси Токио олимпиадаси йўлланмаси учун ўтказиладиган қитъа биринчилигида иштирок этади.

Гандбол бўйича мамлакат чемпионатининг 2-давра баҳслари 14 апрелга қадар давом этади.