Терма жамоамиз Абу-Даби шаҳрига етиб борди. Бугун қуръа, эртага мусобақа!

Йилнинг сўнгги "Катта Дубулға" мусобақасида дунёнинг 5 қитъаси 41 давлатидан жами 225 (137 эркак, 88 аёл) нафар дзюдочи медаллар учун татамига чиқади. Юртимиз шарафини Илиас Илиадис ва Бекзод Тўрабоев мураббийлигидаги 10 нафар дзюдочимиз ҳимоя қилади. Улар орасида Токио Олимпиадаси совриндори Давлат Бобонов ҳам бор. 

Абу-Даби татамиларида Лондон-2012 Олимпиадасида олтин, Рио-2016 кумуш, Токио-2020 Олимпия ўйинларида бронза медали соҳиби бўлган грузиялик Лаша Шавдатуашвили, Токио Олимпиадасининг бронза медали совриндори, жаҳон чемпиони, бельгиялик Маттиас Кассе, Токио Олимпиадасининг олтин (жамоавий) ва кумуш (яккалик) медали эгаси, франциялик Амандин Бушар сингари дзюдо юлдузлари БАА пойтахтига етиб боришган. 

Япония терма жамоаси таркибидан икки аёл дзюдочи ўрин олган. Кунчиқар юртнинг эркаклар терма жамоаси БААга келмайди. Франция 11 эркак, 10 аёл, Россия 13 эркак, 9 аёл, Мўғулистон 10 эркак, 10 аёл, ён қўшниларимиз Тожикистон 10 эркак, Қирғизистон 4 эркак дзюдочи билан мусобақада қатнашади. Қозоғистон дзюдочилари турнирда иштирок этишмайди. 

Терма жамоамиз делегацияси ҳам Абу-Дабига етиб борди. Бугун Тошкент вақти билан соат 15:00да "Катта Дубулға" турнирига қуръа ташлаш маросими бўлиб ўтади. Эртага эса енгил вазн тоифасидаги беллашувлар билан мусобақага старт берилади.              

Абу-Даби "Катта Дубулға"да қатнашадиган таркибимиз:

-52 кг: Диёра Келдиёрова

-60 кг: Дилшодбек Баратов

-66 кг: Дилшодбек Йўлдошев 

-73 кг: Ҳикматуллоҳ Тўраев

-81 кг: Суҳроб Турсунов, Арслонбек Тожиев

-90 кг: Давлат Бобонов 

-100 кг: Музаффарбек Тўрабоев, Ақлмурод Худойбердиев

+100 кг: Шоҳруҳ Мамарасулов