The Guardian: “Синдаров Магнус Карлсенни классик шахматга қайтириши мумкин"

Унда бу натижа Магнус Карлсенни яна классик шахматга қайтариши мумкинми, деган савол ҳам кўтарилган.

Мақолада айтилишича, Синдаров бутун турнир давомида ўйинни тўлиқ назорат қилган. Унинг услуби эса совуққонлик, тартиб ва аниқ ҳисоби туфайли Миҳаил Ботвинник мактабини эслатади.

Энг катта устунликларидан бири эса тайёргарлик. У кўп партияларда ўйин ривожини олдиндан жуда аниқ ҳис қилган, ҳатто баъзи ҳолатларда эндшпильгача бўлган режани олдиндан кўриб чиққандек таассурот қолдирган.

Шунингдек, Жавоҳир босим остида ҳам ўзини йўқотмади. Масалан, Фабиано Каруанага қарши мураккаб вазиятда ҳам ҳимояни жуда аниқ олиб борди.

Натижа эса рекорд даражада - 6 ғалаба, 8 дуранг. Бу ҳозирги форматдаги Номзодлар турнирида энг яхши кўрсаткич. Энди уни жаҳон чемпионлиги учун Гукеш Доммаражуга қарши 14 партиялик матч кутмоқда. Иккаласи ҳам ўша пайтга келиб 20 ёшда бўлади.

Ҳозирги ҳолатда Синдаров фаворит сифатида кўрилмоқда, лекин Гукеш ҳам кучли қаршилик кўрсатиши аниқ.

Мақоладаги энг қизиқ савол эса бошқача:

— Агар имкон бўлса, Карлсен Синдаровга қарши яна жаҳон чемпионлиги учун ўйнайдими?

Эслатиб ўтилишича, аввалроқ Карлсен фақат Алиреза Фирузжага қарши ўйнасагина, қайтиши мумкинлигиини айтганди. Аммо вақт ўтиши билан вазият ўзгарди. Фирузжа кутилган даражада ўсмади, Синдаров эса аксинча, жуда тез юқори даражага чиқди.

Мақолада Синдаровнинг йўли ҳам алоҳида таъкидланади. У ёшлигида Контр-страйкка берилиб кетгани, лекин кейин яна жиддий равишда шахматга қайтиб, қисқа вақт ичида элита даражасига чиққани ва ҳатто Ўзбекистон терма жамоаси билан Олимпиада олтинини ҳам қўлга киритгани эътироф этилган..

Ёзилишига кўра, агар Карлсен ва Синдаров ўртасида матч бўлиб ўтса, бу жуда катта воқеа бўлади. Шунингдек, катта даромад ҳам келтириши мумкин.

Лекин якуний хулосага кўра, Карлсеннинг қайтиши эҳтимоли катта эмас. Чунки у айнан узоқ ва чуқур компьютер тайёргарлигидан чарчаган эди. Бу эса ҳозирги шахматда, айниқса Синдаров каби ўйинчиларга қарши, энг муҳим омиллардан бири.