Тоҳиржонова Хитойдаги кучлилар турнирида мағлубиятсиз дона суряпти ФОТО

Умумий соврин жамғармаси 119 000 АҚШ долларини ташкил этувчи Belt & Road China 2019 мусобақасида сайёрамизнинг кучли шахмат қироличалари ўз маҳоратини намойиш этяпти. Улар орасида гроссмейстеримиз Гулруҳбегим Тоҳиржонова ҳам мағлубиятсиз одимламоқда. 

Тоҳиржонова бугунгача ўтказилган учта турда мағлубиятга учрамаган тўрт нафар шахматчидан бири бўлиб турибди. Дастлабки икки партияда хитойлик рақибаларини мағлуб этган Гулруҳбегим бугун 3-турда дуранг ўйнади. У қора доналарда ҳаракат қилиб, рейтингда ўзидан юқорида турган хитойлик Жу Жинер билан муросага келди.

Хитойдаги халқаро турнирда россияликлар Александра Костенюк, Ольга Гиря, ҳиндистонлик Харика Дроновалли, грузияликлар Нино Батсиашвили, Нана Дзагнидзе, болгариялик Антоанета Стефанова, украиналик Анна Ушенина сингари машҳур гроссмейстерлар дона суришяпти. 

Бугун ўтказилган 3-тур учрашувларидан сўнг мусобақа жадвалида бир йўла тўрт нафар шахматчи Антоанета Стефанова, хитойлик Жу Жинер, мўғулистонлик Батхуяг Мунгунтуул ҳамда Гулруҳбегим Тоҳиржонова 2,5 тадан очко жамғариб, пешқадамлик қилишяпти. Эртага 4-турда ҳамюртимиз биринчи тахтада оқ доналарда Стефановага қарши баҳс олиб боради. 

Маълумот учун, мусобақа ғолиби 40 000 долларни қўлга киритади. Иккинчи ўринга 20 000, учинчи ўринга 15 000 АҚШ доллари миқдоридаги мукофот пули кафолатланган.