Тўлқин Қиличев БРИКС ўйинларининг боксчиларимиз учун аҳамияти ҳақида гапирди

Ушбу комплекс мусобақа дастуридан бокс баҳслари ҳам ўрин олган бўлиб, унда Ўзбекистон терма жамоаси ҳам тўлиқ таркибда иштирок этяпти. Терма жамоа бош мураббийи Тўлқин Қиличев БРИКС ўйинларининг боксчиларимиз учун аҳамияти ҳақида тўхталиб ўтди. 

"Олимпиада олдидан ўтказилаётган ушбу комплекс мусобақанинг аҳамияти катта. Асосий жиҳатларидан бири, унинг формати айнан Олимпиадага ўхшаб кетади. Боксчи учун қанча кўп мусобақа бўлса, шунча яхши. Айниқса, оғир вазн тоифаси боксчиларига ҳар доим жанглар кам бўлган. Кейин бу вазнларда иштирокчилар ҳам кам бўлади. Табиийки, жанглар сони ҳам шунга яраша кам бўлади. Шуни инобатга олган ҳолда Париж-2024 Олимпиадасида қатнашадиган икки боксчимиз Тўрабек Ҳабибуллаев (-80 кг) ва Баҳодир Жалолов (+91 кг)ни БРИКС ўйинларига қўйдик. Уларга кўпроқ жанг амалиёти керак. Қолаверса, иккинчи ва учинчи рақамли боксчиларимизни ҳам Қозонга олиб келганмиз. Улар учун ҳам бу мусобақа катта тажриба мактаби вазифасини ўтаб беради", - деди Қиличев.