Том Аспиналл қайтганини эълон қилди

"Ишга қайтяпман", - деб ёзди оғир вазнли чемпион ўзининг ижтимоий тармоқдаги саҳифасида.

Британиялик аралаш яккакураш устасининг баёноти Сирил Ган ва Алекс Перейра жанг қилиши кутилаётган вақтинчалик чемпионлик камари ҳақидаги гап-сўзлар, шунингдек, собиқ дивизион чемпиони Жон Жонс ташкилот билан Оқ уй турнирига қайтиш бўйича музокаралар олиб бораётгани борасидаги хабарлар фонида янгради.

Том Аспиналл ўтган йилнинг октябрь ойидан бери октагонга чиқмаган. Ўшанда биринчи раунд охирида Сирил Ган бармоқлари билан Томнинг кўзига икки бор зарба берган ва бунинг натижасида британиялик жангни давом эттира олмаган эди. Ёзгача вақтинчалик камарга эгалик қилиб келган британиялик Жон Жонс фаолиятини якунлаганини эълон қилганидан кейин тўлақонли чемпионга айланганди.