31 авг 08:16
Янгиликлар

Бокс/ММА

Тони Фергюсон олти йил деганда илк ғалабасини қўлга киритди. Бу ғалаба унга камар келтирди

Теглар : Тони Фергюсон Misfits Boxing 22

Аралаш яккакурашлар фахрийси Тони Фергюсон Манчестерда бўлиб ўтган Misfits Boxing 22 турнирида боксдаги дебютини муваффақиятли ўтказди.

Америкалик собиқ UFC жангчисининг рақиби, "Solt Papi" номи билан танилган блогер Натаниэл Бустаманте бўлди. У икки раунд давомида "Эл Кукуй" билан тенгма-тенг жанг қилди, тезликда Фергюсондан қолишмади. Чап томондан йўллаган зарбалари анча хавфли чиқди.

Аммо Тони вазиятдан чиқиб кетди ва ўзи Бустамантега кучли ва аниқ зарбалар берди. Бу ҳолатда рефери учинчи раунднинг 2:43 дақиқаси давом этаётган бир паллада жангни тўхтатди. "Solt Papi" ҳакамнинг қароридан норози бўлди, аммо рефери фикрида собит қолди. Фергусон рингга тиз чўкиб, кўз ёшларини тия олмади.

Ғалаба қозонган 41 ёшли Тони Фергюсон ўрта вазн тоифасида вақтинчалик Misfits Boxing чемпионлик камарини қўлга киритди. Бунгача у охирги марта 2019 йилнинг июнида Чикагодаги UFC 238 турнирида ҳамюрти Дональд Серронени техник нокаутга учратганди. "Ковбой" устидан қозонилган ғалабадан сўнг Фергюсон кетма-кет саккизта жангда мағлубиятга учради ва ўтган йилнинг август ойида дунёнинг энг кучли лигаси UFC`ни тарк этди.