Топурия мағлубиятидан уч ой ўтиб, ниҳоят сукунатни бузди

Испания-грузиялик собиқ чемпион бу мағлубият уни янада кучлироқ қилганига ишонч билдирди.

"Ҳаётда доимо ғалаба қозонишнинг иложи йўқ ва бу табиий ҳол, чунки мағлубиятнинг ўзи ҳеч нарсани англатмайди. Муҳими — қандай мағлуб бўлишингизда. Атрофингиз қоронғуликка чўмганда ким бўлишни хоҳлайсиз? Пастда қолишни танлайсизми ёки ўрнингиздан туришга қарор қиласизми?

Ўйлайманки, Худо мен буни бошдан кечиришимни ва ҳеч қандай ғалаба менга ўргата олмайдиган нарсаларни ўрганишимни хоҳлади. Дўзахни босиб ўтиб, мен аввалгидан ҳам кучлироқ бўлдим. Чунки чемпион — ҳеч қачон йиқилмайдиган эмас, балки ҳар доим ўрнидан туриш учун сабаб топа оладиган инсондир.

Характер ҳамма нарса сиз хоҳлагандек кетаётганда эмас, балки ҳамма нарса режадан чиқиб кетганда шаклланади. Ҳеч ким сиздан тортиб ололмайдиган ягона ғалаба — бу сизнинг характерингиздир. Биз қайтамиз!", — деди "Эл Матадор" ижтимоий тармоқларда эълон қилинган видеода.

Ўтган йилнинг июнь ойида ярим енгил вазн тоифасидаги чемпионлик камаридан воз кечган Илия Топурия Чарльз Оливейрани нокаутга учратиб, енгил вазнда вакант бўлган UFC чемпионлик камарини қўлга киритган эди. Бироқ жорий йилнинг июнь ойида у бирлаштирувчи жангда Жастин Гэтжига камарини бой берди.

Фаолиятидаги илк мағлубиятдан сўнг Топурия ҳеч қандай баёнот бермаган эди, аммо унинг жамоаси Илиянинг йил охирида октагонга қайтиши мумкинлигини маълум қилганди.