17 окт 18:22
Янгиликлар

Бокс/ММА

Топурия Оқ уйдаги жанг учун рақибни айтди. Амалга ошса, йил жанги бўларди-ку!

Илия Топурия ижтимоий тармоқларда келаси йили Оқ уйда бўлиб ўтадиган UFC фестивалида асосий жанг иштирокчиси бўламан деганда қайси жангни назарда тутганини ошкор қилди.

"Мен Ислам Махачев билан Оқ уй олдида жанг қилмоқчиман. Агар бу амалга ошса, UFC тарихидаги энг йирик жанглардан бири бўларди. Ҳали ҳеч ким учинчи камар учун жанг қилмаган. Ислам аввалги вазн тоифасида устунлик қилди ва бошқа вазнга ўтди. Шундан келиб чиқиб айтиш мумкинки, бу жуда катта ва ажойиб жанг бўлади", - деди испания-грузиялик аралаш яккакураш устаси.

Ушбу жанг ҳақиқатга айланиши учун Ислам Махачев 15 ноябрь куни Нью-Йоркда бўлиб ўтадиган UFC 322 турнирининг асосий жангида австралиялик Жек Делла Маддалендан ярим ўрта вазн тоифасидаги чемпионлик камарини тортиб олиши, Илия Топурия эса ўз навбатида келаси йил бошида ўзига тегишли енгил вазн тоифасидаги чемпионлик камарини ҳимоя қилиши керак бўлади.

Маълумотларга кўра, "Эл Матадор" январь ойида Лос-Анжелесда бўлиб ўтадиган UFC 324 турнирида октагонга кўтарилади. Унинг рақиби америкалик Жастин Гэтжи ёки британиялик Пэдди Пимблетт бўлади.