01 июл 13:56
Янгиликлар

Спорт курашлари

Тўрт нафар эркин курашчимиз Осиё чемпионатида шоҳсупага кўтарилди

Шу кунларда Иордания пойтахти Амман шаҳрида спорт курашлари бўйича 23 ёшгача бўлган спортчилар ўртасида Осиё чемпионати бўлиб ўтмоқда.

Мусобақанинг навбатдаги куни эркин кураш бўйича беллашувлар ташкил этилиб, 4 нафар полвонимиз совриндорлар сафидан жой олди. 61 кг вазн тоифасида курашган Беҳрузбей Туронмуродов кумуш медаль соҳибига айланди. У финал баҳсида қозоғистонлик Мерей Базарбаевга 8:11 ҳисобида имкониятни бой бериб қўйди.

Энг оғир вазн (125 кг) тоифасидаги эркин курашчимиз Намоз Абдурашидов ҳам финалгача мағлубиятсиз етиб борди. У олтин медаль учун кечган беллашувда ҳиндистонлик рақибига ютқазиб қўйди.

Осиё чемпионатининг бронза медаллари Зафарбек Отахонов (-74 кг) ва Муҳаммадқодир Қўлдошев (-65 кг)га насиб этди. Отахонов бронза учун кечган учрашувда мўғулистонлик Батбаяр Батсукҳни 6:1, Қўлдошев эса қозоғистонлик Бекзат Еермекбайни 4:1 ҳисобида таслим этди.