Тўрт нафар юнон-рум курашчимиз Осиё чемпионати финалида!

Эътиборлиси, бугун гиламга чиққан тўрт нафар юнон-рум курашчимизнинг бари 23 ёшгача ёшлар ўртасидаги Осиё чемпионатининг финалига йўл олди. 60 кг вазндаги курашчимиз Шермуҳаммад Шарибжонов ярим финалда туркманистонлик Арсланбек Закирбаевни 9-0 ҳисобида доғда қолдирди. Шарибжоновнинг финалдаги рақиби мезбонлар вакили Нурмуҳаммет Абдуллаев бўлади. 

Осиё чемпионлиги учун асосий даъвогар ҳисобланаётган Аброр Атабаев 67 кг вазн тоифаси ярим финалида туркманистонлик Салиҳберди Ҳоммадовни муддатидан аввал таслим (8-0) эта олди. Атабаевнинг финалдаги рақиби ҳам қирғизистонлик курашчи Азамат Самат бўлади. У ярим финалда ҳиндистонлик Гаурав Духунни 8-0 ҳисобида енгди. 

72 кг вазнда юртимиз шарафини ҳимоя қилаётган Жаҳонгир Ҳамроев туркманистонлик Бегмират Нобатовни 11-2, саудиялик Ҳассан Барнавини 4-0, ярим финалда қозоғистонлик Кирил Минкони 9-0 ҳисобида доғда қолдирди. Унинг олтин медаль учун кечадиган финал баҳсидаги рақиби қирғизистонлик Адилхан Нурланбеков бўлади. У ҳозиргина якунига етган ярим финал учрашувида туркманистонлик рақибидан 9-4 ҳисобида устун келди.  

77 кг вазн тоифасидаги Дилшод Омонгелдиев ярим финалда ҳиндистонлик Сажан Сажандан 8-0 ҳисобида устун келди. Ҳамюртимиз кечки финал дастурида қирғизистонлик Акилбек Талантбековга қарши Осиё чемпионлиги учун гиламга чиқади.