“Тошкент-2019” халқаро турнирини ишончли ғалаба билан бошладик

Унда Ўзбекистон, Тожикистон, Туркманистон ҳамда Қирғизистон терма жамоалари ғолиблик учун баҳсларга киришди. 

Дастлаб майдонга Туркманистон ва Тожикистон терма жамоалари тушишди. Қизғин кечган ўйинда туркманистонлик волейболчилар 3:0 ҳисобида ғалаба қозонди.

Шундан сўнг турнирнинг тантанали очилиш маросими ўтказилди. Унда сўзга чиққан Ўзбекистон Республикаси жисмоний тарбия ва спорт вазири Дилмурод Набиев юртимизда волейболни оммалаштириш борасида амалга оширилаётган ишларга тўхталиб ўтди:

- Ўзбекистон ҳудудига волейбол спорти 1924-25 йилларда кириб келган бўлиб, ўтган давр мобайнида у шонли тараққиёт йўлини босиб ўтди. Айниқса, юртдошларимиз орасидан Вера Дуюнова, Лариса Павлова сингари Олимпиада чемпионлари етишиб чиққанлиги дарҳақиқат волейбол юртимизда анча тараққий этганлигидан дарак беради. Бугунги кунда Ўзбекистон ҳукумати ушбу спорт турини янада оммалаштириш ва ривожлантириш йўлида кенг кўламли ишларни амалга оширмоқда. Жумладан, вазирлик, идора, хўжалик бирлашмалари, йирик корхона ва ташкилотларнинг марказий аппарати тизимида фаолият олиб бораётган хотин-қизлар ўртасида “Бош вазир кубоги” мусобақаларининг ўтказилиши ушбу спорт турини юртимизда янада оммалаштириш ва ривожлантиришга хизмат қилади.

Очилиш маросимида Ўзбекистон давлат цирки артистлари, шунингдек Ўзбек жанг санъати ва Турон яккакураши тўгаракларининг тарбияланувчилари ўз чиқишлари билан йиғилганларни хушнуд этди.

Куннинг иккинчи ярмида майдонда Ўзбекистон ҳамда Қирғизистон терма жамоалари баҳс олиб боришди. Дастлабки партия муросасиз курашлар остида ўтиб, унда 26-24 ҳисоби билан ҳамюртларимизнинг қўли баланд келди. Бироқ, кейинги партияларда вакилларимиз катта устунликка эришди ҳамда 25-12, 25-17 ҳисобларида ғалабага эришди.

“Тошкент-2019” халқаро турнири

8 ноябрь, жума
10:00 Туркманистон – Тожикистон – 3:0
14:30 Ўзбекистон – Қирғизистон – 3:0 (26-24, 25-12, 25-17)

9 ноябрь, шанба
10:00 Қирғизистон – Туркманистон
14:30 Тожикистон – Ўзбекистон

10 ноябрь, якшанба
10:00 Тожикистон – Қирғизистон
14:30  Ўзбекистон – Туркманистон