Тошкент-2025 ёшлар Осиё ўйинларига тайёргарлик масалалари қайта муҳокама қилинди

Ўзбекистон Миллий Олимпия қўмитасида ушбу муҳим мусобақаларга олиб борилаётган тайёргарлик юзасидан йиғилиш ўтказилди. Унда МОҚ Бош котиби Ойбек Касимов, Қўмита раиси ўринбосари Азизжон Камилов, шунингдек, федерация ва ассоциациялар масъуллари иштирок этишди.

Учрашувни Ойбек Омилович олиб борар экан, Ўйинларга ҳар томонлама пухта тайёргарлик кўриш, уни юқори савияда ўтказиш қанчалик муҳимлиги ҳақида тўхталди. Шунингдек, ёшлар Осиё ўйинлари 2025 йилнинг сентябрь, ёшлар Пара Осиё ўйинлари эса октябрь ойида ўтказилиши режалаштирилаётгани, унинг дастурига кирувчи тахминан 90 фоиз спорт тури аниқ бўлиб улгургани ҳақида маълумот берди.

Йиғилиш давомида федерациялар билан ҳар бир спорт турларидаги беллашувлар қайси объектда неча кун давомида ўтказилиши, қанча дастурларда медаллар ўйналиши борасида фикр алмашилди. Ўз навбатида, Азизжон Якубжанович барча спорт туридаги беллашувлар учун зарур инвентарлар рўйхатини шакллантириш масаласига алоҳида тўхталиб ўтди.

Якунда федерацияларга Ўйинларни ўтказиш бўйича ташкил этилган дирекция билан ишловчи масъулларни бириктириш, спорт дастурларини кўриб чиқиш, халқаро ва Осиё федерациялари томонидан ажратиладиган ҳакамлар ва техник делегатлар бўйича маълумот шакллантириш, баҳсларни ўтказиш учун зарур инвентарлар рўйхатини кўриб чиқиш борасида кўрсатмалар берилди.