Тошкент бадиий гимнастика бўйича Жаҳон кубоги босқичига тайёргарликни давом эттирмоқда

Кеча МОҚ ҳамда Жисмоний тарбия ва спорт вазирлиги раҳбарияти мусобақага олиб борилаётган тайёргарликни кўздан кечириш учун Гимнастика саройига ташриф буюришди.

МОҚ раиси Рустам Шоабдураҳмонов ҳамда Жисмоний тарбия ва спорт вазирининг биринчи ўринбосари Равшан Ирматов бошчилигидаги мутасаддиларга Ўзбекистон гимнастика федерацияси раиси вазифасини бажарувчи Руслан Мустаев ҳамроҳлик қилди.

Таъкидлаш жоиз, ушбу мусобақа Токио Олимпиадасига яккалик йўналишида лицензиялар ўйналадиган 4 босқичдан биридир. Якунда ушбу турнирлардаги кучли учлик Олимпиада йўлланмалари соҳибига айланади. Унда иштирок этиш учун эса 32 мамлакатнинг 100 нафардан ортиқ спортчисидан талабнома тушган. Шундай экан, мусобақага ҳар томонлама муносиб тайёрланиш керак.

Мутасаддилар ташриф давомида аренада олиб борилаётган тайёргарлик ишлари билан яқиндан танишиб, уни юқори баҳолашди. Баъзи йўналишлар бўйича кўрсатма ва таклифларини билдиришди. Шунингдек, мусобақа пайти карантин талабларига қатъий риоя қилиш, меҳмонларнинг саломатлиги ва хавфсизлигини таъминлашни назоратга олиш бўйича кўрсатма берилди. Қайд этиш жоиз, учрашув давомида терма жамоамизнинг 3 нафар вакилига Халқаро тоифадаги спорт устаси, 2 нафарига эса спорт устаси унвони тақдим этилди.