Тошкент “Челленжер”. Асосий тўрда 6 теннисчимиз, уларнинг илк рақиблари маълум

Соврин жамғармаси 150 000 АҚШ долларини ташкил қилувчи мусобақага қуръа ташланди. Унга кўра, асосий тўр баҳсларида 6 нафар теннисчимиз иштирок этиши маълум бўлди. Уларнинг 4 нафарига турнир ташкилотчилари имтиёзли йўлланма тақдим этишди.

Фақатгина турнирнинг биринчи ракеткаси Денис Истомин ҳамда мамлакатимизнинг иккинчи ракеткаси Санжар Файзиев рейтингда эгаллаб турган ўринлари бўйича асосий тўрда қатнашишади.

Қолган теннисчиларимиз - Фаррух Дўстов, Темур Исмоилов, Жўрабек Каримов ва Ҳумоюн Султонов эса имтиёзли чипта асосида асосий тўрга қўйилишди.

Бироз аввал хабар берганимиздек, мамлакатимиз ҳамда турнирнинг биринчи ракеткаси Денис Истомин илк даврада яна бир ҳамюртимиз Фаррух Дўстовга қарши кортга чиқади. Истомин айни пайтда дунё рейтингида 53-ўринни эгаллаб турибди.

Теннисчиларимизнинг 1-даврадаги рақиблари:

Денис Истомин (Ўзбекистон) – Фаррух Дўстов (Ўзбекистон)

Санжар Файзиев (Ўзбекистон) – Алдин Сеткич (Босния ва Герцеговиния)

Ҳумоюн Султонов (Ўзбекистон) – Аттила Балаж (Венгрия)

Жўрабек Каримов (Ўзбекистон) – Александр Бублик (Қозоғистон, 3)

Темур Исмоилов (Ўзбекистон) – Томас Фаббиано (Италия, 2)