Тошкент шаҳар ҳокимлиги барчани алдаганмиди? Осиё ўйинлари ва Пара Осиё ўйинлари ғолиб ва совриндорларига ҳалигача пул мукофотлари берилмагани ҳақида хабарлар тарқалмоқда

Тошкент шаҳар ҳокими ўринбосари Санжар Обидов, шунингдек, Маҳалла уюшмаси раиси Фурқат Маҳмудхўжаев иштирок этган ушбу тақдирлаш маросимида олтин медални қўлга киритган спортчиларга 36 млн сўм, кумуш медаль эгаларига 18 млн ҳамда бронза медалини қўлга киритган спортчиларга 9 млн сўм пул мукофоти топширилгани айтилган эди.

Бироқ, Eltuz нашрининг хабар беришича, спортчиларга ҳалигача пул мукофотлари берилмаган:

"Жорий йилнинг 23 январида Тошкент шаҳар ҳокимлигида Хитой Халқ Республикасининг Ханчжоу шаҳрида бўлиб ўтган XIX ёзги Осиё ва IV Параосиё ўйинларида иштирок этиб, ғолибликни қўлга киритган спортчилар муносиб тақдирландилар, дея айтилди. Аммо протоколга қўл қўйдириб, телевизор беришдию, орадан бир ой ўтган бўлса-да, мукофот пулидан дарак йўқ. Бошқа вилоятлар 1-ўринга 99 миллион, 2-ўринга 66 миллион, 3-ўринга 33 миллиондан мул мукофоти олишган бир пайтда Тошкент шаҳри бюджети энг катта бўлишига қарамай, пул мукофотларимизни ололганимиз йўқ. 

Аслида эса Тошкент шаҳри бўйича 1-ўрин учун 36 миллион, 2-ўрин учун 18 миллион, 3-ўрин учун эса 9 миллион сўм пул мукофоти ажратилган эди. Бу кетишда Тошкент номидан чиқадиган спортчилар вилоят номидан чиқади! Чунки уларга ўз вақтида ва Президент белгилаган миқдорда мукофотлар берилади.

Параосиё ўйинлари сентябрь ойида бўлган ва вилоятлар мусобақадан кейин узоғи билан Янги йилда тақдирланди. Аммо нима учун мусобақадан ярим йил ўтган бўлса-да, Тошкент шаҳри ҳали-ҳануз тақдирланмаяпти?”.

Эслатиб ўтамиз, XIX ёзги Осиё ва IV Параосиё ўйинларида Тошкент шаҳридан 115 нафар спортчи қатнашган. Ўзбекистон делегацияси аъзолари Осиё ўйинларида 22 та олтин, 18 та кумуш ва 31 та бронза, жами 71 та медални жамлаб, умумжаҳон ҳисобида 45 та давлат орасидан фахрли 5-ўринни қўлга киритишган эди.

IV Параосиё ўйинларида иштирок этган ўзбекистонлик спортчилар 25 та олтин, 24 та кумуш ва 30 та бронза, жами 79 та медални қўлга киритиб, Ўзбекистон делегациясининг Параосиё ўйинлари тарихидаги энг яхши натижасини қайд этган. Ўзбекистон делегациясининг тошкентлик аъзолари 12 та олтин, 4 та кумуш, 19 та бронза соҳибига айланиб, умумий ҳисобда 35 та медални қўлган киритишган", дейилади Eltuz хабарида.