Тошкент вилояти спорт бошқармаси тадбиркорларга давлат-хусусий шериклик асосида бўш ер майдонларини таклиф қилди

Унда бошқарма тасарруфидаги барча туман(шаҳар) жисмоний тарбия ва спорт бўлимлари, болалар-ўсмирлар спорт мактаблари раҳбарлари ҳамда тадбиркорлар иштирок этди.

Йиғилишда сўзга чиққан Тошкент вилояти ҳокимининг туризм ва спорт масалалари бўйича ўринбосари Сайфиддин Низамов Ўзбекистон Республикаси Президентининг «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги Фармонда белгиланган топшириқлар ижроси доирасида ҳар бир туман(шаҳар)да ташкил этилган Streetball, Wоrkout майдончалари ҳамда «Саломатлик йўлакчалари» бўйича амалга оширилган ишлар тўғрисида тўхталиб ўтди. Спорт майдончаларини қуриш борасида сусткашликка йўл қўяётган туман(шаҳар)лар жисмоний тарбия ва спорт бўлимларига тегишли тавсиялар берилди.

Сўнгра Тошкент вилояти Жисмоний тарбия ва спорт бошқармаси бошлиғи К.Адилов ҳам сўзга чиқиб, Ўзбекистон Республикаси Вазирлар Маҳкамасининг 2020 йил 26 апрелдаги «Давлат-хусусий шериклик лойиҳаларини амалга ошириш тартибини такомиллаштириш тўғрисида»ги Қарорида белгилаб берилган топшириқлар ижросига алоҳида тўхталиб, болалар-ўсмирлар спорт мактаблари ҳудудидаги бўш ётган ер майдонлари тадбиркорларга белгиланган тартибда давлат-хусусий шериклик асосида берилишини маълум қилди. Ушбу ўзаро манфаатли битим аввало спортни ривожлантиришга ҳисса қўшиши лозимлиги таъкидланди.

Шу ернинг ўзида К.Адилов Тошкент вилоятида давлат-хусусий шерикликни ривожлантириш мақсадида барча тадбиркорларга Мурожаатнома йўллади. Эътиборлиси, йиғилиш якунида 7 нафар тадбиркор Тошкент вилояти Жисмоний тарбия ва спорт бошқармасига қарашли бўш ер майдонларидан давлат-хусусий шериклик асосида фойдаланиш таклиф билан чиқишди.