Тошкент вилоятидаги спорт мактаби биносида қарийб 6 кг марихуана қовураётган қоровул ушланди

Бу ҳақда ИИВ ҳузуридаги Тергов департаменти хабар берди.

Қайд этилишича, 5 сентябрь куни соат 23:30 да, ИИБ ва Миллий гвардия ходимлари ўзларига бириктирилган Чирчиқ шаҳри Ўзбекистон кўчасида тунги хизматни олиб бораётган вақтда мазкур ҳудуддаги Болалар ва ўсмирлар спорт мактаби биносидан ўзига хос ҳид таралаётганлигини билиб, текшириш мақсадида бино хонасига кирган. Хонада мактаб қоровули бўлиб ишловчи 38 ёшли Т.Б. ва 29 ёшли Д.О. электр плитаси ёрдамида ошхона қозонида ўзига хос модда қовураётганини аниқлаб, бу ҳақда шаҳар ИИБга хабар берган.

Мазкур хабар асосида тезкор-тергов гуруҳи томонидан ҳодиса жойини кўздан кечириш давомида хонада бўлган телевизор коробкаси ва ёғоч фанер устидаги ёйиб қўйилган яшил рангдаги, ўзига хос ҳидли модда, 4 дона гугурт қутиси ва 2 дона 0,5 литр ҳажмдаги банкаларда қуритилган модда ҳамда чекиш учун махсус мослама аниқланиб, ашёвий далил тариқасида расмийлаштириб олинган.

Судга оид кимёвий экспертиза хулосасига кўра, Т.Б.дан олинган ўсимлик туп гуллари ва баргларидан ташкил топган, ҳўл ҳолдаги таркибида фаол гиёҳванд модда тетрогидроканнабинол мавжуд бўлган марихуана  бўлиб, соф оғирлиги 5,7 килограммни ташкил қилган.

Бундан ташқари, ҳодиса жойидан олинган икки дона баклажка, 1 дона шиша идиш ва ангишвонада фаол гиёҳванд модда — тетрогидроканнабинол юқлари мавжудлиги аниқланган.

Ҳолат юзасидан Чирчиқ шаҳри ИИБ ҳузуридаги Тергов бўлими томонидан Жиноят кодексининг 276-моддаси 2-қисми «а» банди (гиёҳвандлик воситаларини ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан жиноят иши қўзғатилган.

Тергов ҳаракатлари давомида аниқланишича, мажмуа қоровули Т.Б. гиёҳвандлик воситасини истеъмол қилиш учун ўзининг таниши Д.О.ни спорт мактабига чақирганлиги аниқланган.

Ҳозирда Т.Б. жиноят ишида гумон қилинувчи тариқасида иштирок этишга жалб қилиниб, процессуал тартибда ушланган.