Тошкентда 80 000 доллар мукофот пулига эга Президент кубоги бошланди

Мукофот жамғармаси 80 минг АҚШ долларини ташкил этувчи мазкур мусобақада дунёнинг турли мамлакатларидан келган гроссмейстерлар бош соврин учун баҳсларга киришди. Ҳиндистонлик Ниҳал Сарин (2701) турнирда биринчи рақам остида сараланган бўлиб, у 1-турда оқ доналарда германиялик Фредерик Свэнни мағлубиятга учратди. 

Мусобақада бешинчи рақам остида сараланган ҳамюртимиз Шамсиддин Воҳидов (2641) ҳам ўз иштирокини ғалаба билан бошлаб олди. Гроссмейстеримиз франциялик Максим Лагарде (2608 )ни оқ доналарда ўйнаб таслим этди. Яна бир ёш гроссмейстеримиз Муҳиддин Мадаминов (2552) ҳам илк турда зафар қучди. У блиц бўйича уч карра жаҳон чемпиони, турнирнинг учинчи сараланган шахматчиси, россиялик Александр Гришукдан устун келди. Гроссмейстеримиз Абдималик Абдисалимов (2561) эса иккинчи сараланган иштирокчи, арманистонлик Шант Саргсян (2665)га имкониятни бой берди. 

Бироздан сўнг, аниқроғи соат 15:00да 2-тур учрашувлари бошланади. Шамсиддин Воҳидов қора доналарда украиналик гроссмейстер Юрий Кузубовга қарши баҳс олиб боради. Муҳиддин Мадаминов ҳам қора доналарда ўйнайди, унинг рақиби Шант Саргсян бўлади. Абдималик Абдисалимов оқ доналарда Фредерик Свэн билан ҳисоб-китоб қилади.