Тошкентда “Мўйноққа мадад” веломарафони ўтказилди

 Бугун пойтахтимиздаги марказий кўчаларда ушбу шиор остида веломарафон ташкил этилди.

“Ҳумо арена” муз саройининг олдида старт олган мусобақа Тошкентнинг чиройли ва эътиборли кўчалари бўйлаб йўналиш олди. Бу эса шаҳримиз аҳолиси орасида соғлом турмуш тарзини яна-да кенг тарғиб қилиш, ёшларни спортга жалб этиш йўлидаги муҳим тадбирлардан бири бўлди. Аҳамиятлиси, унда яқинда тузилган пара-велоспорт бўйича терма жамоамиз вакиллари ҳам иштирок этишди.

Экологик хайрия марафонининг очилиш маросимида МОҚ раиси Рустам Шоабдураҳмонов, Туризм ва спорт вазирининг ўринбосари Аваз Каримов, Ўзбекистон Экологик партияси Марказий Кенгаши ижроия қўмитаси раиси Нарзулло Обломуродов, Ўзбекистон велосипед спорти федерацияси мутасаддилари иштирок этишди. Тадбирда сўз олган вакиллар ҳукуматимиз бошчилигида соғлом турмуш тарзи тарғиботига қаратилаётган эътибор, айниқса, Оролбўйи ҳудудида экологик мувозанатни тиклаш каби йўналишларда олиб борилаётган ислоҳотларга урғу бериб ўтишди.

Мазкур лойиҳа 21-май куни юртимизнинг энг чекка шарқий ҳудуди, Андижон вилоятининг Хонобод шаҳрида старт олган бўлиб, Мўйноқ шаҳрида якунланади. Ундан тушган хайрия пуллари Мўйноқнинг ирригация тизимларини яхшилаш, аҳолини тоза ичимлик суви билан таъминлаш каби муаммоларини ҳал этишга йўналтирилади.