Тошкентда оғир атлетика бўйича ўсмирлар ва ёшлар ўртасидаги Осиё чемпионати якунланди, энг яхшилар тақдирланди + ФОТО

Қитъамизнинг 30 дан ортиқ мамлакат вакиллари иштирок этган мазкур мусобақа Токио Олимпиадаси йўлланмалари учун қимматли рейтинг очколарини тақдим қилди.

Мусобақа якунлангач мазкур қитъа биринчилигининг тантанали ёпилиш маросими бўлиб ўтди. Унда анъанага мувофиқ барча тоифаларда энг яхшилар аниқлаб олинди. Аҳамиятлиси, терма жамоамиз мусобақа якунига кўра ёшлар тоифасида ҳам йигитлар, ҳам қизлар, ўсмирлар классификациясида эса йигитлар ўртасида очколар бўйича энг яхши жамоа дея қайд этилди. Йигитларимиз турнир давомида 3 та олтин, 6 та кумуш ва 7 та бронза медалларини қўлга киритган бўлишса, қизларимиз 13 та олтин, 5 та кумуш ва 2 та бронза медалларини жамғаришди.

Яна бир жиҳат, турнир давомида ўсмирлар ўртасида 6 та жаҳон рекорди ўрнатилди ва янгиланди. Шунингдек, тадбирда Осиё чемпионатининг энг яхши спортчилари номи ҳам эълон қилинди. Ёпилиш маросимида янграган куй-қўшиқлар шаҳримиз меҳмонларининг кайфиятини янада кўтарди.

Таъкидлаш жоиз, Ўзбекистон оғир атлетика федерацияси қисқа фурсат ичида 2 йирик мусобақаларга пухта тайёргарлик кўрди ва уни юқори савияда ташкил қилди. Буни Халқаро оғир атлетика федерацияси мутасаддилари ҳам турнир давомида эътироф этишди.

Матн: МОҚ матбуот хизмати

Суратлар муаллифи: Алимурод Мамадаминов