Тошкентда пара енгил атлетика бўйича Ўзбекистон чемпионати бошланди + ФОТО

Эътиборлиси, бу жараёндан паралимпия спорт турлари ҳам четда қолаётгани йўқ.

Хусусан, жисмоний имконияти чекланган ва ногиронлиги бўлган шахслар ўртасида соғлом турмуш тарзини тарғиб қилиш, уларнинг спорт билан мунтазам шуғулланишлари учун зарур шарт-шароитлар яратиш йўлида кўплаб ишлар амалга оширилмоқда. Айниқса, 2021 йилнинг 18 май куни Ўзбекистон Республикаси Президенти томонидан имзоланган “Паралимпия ҳаракатини ривож-лантиришга доир қўшимча чора-тадбирлар тўғрисида”ги Қарор мамлакатимизда Паралимпия ҳаракатини янги босқичга олиб чиқишга хизмат қилмоқда. 

Президентимизнинг 2021 йил 5 ноябрда имзолаган “2024 йил Париж шаҳрида (Франция) бўлиб ўтадиган XXXIII ёзги Олимпия ва XVII Паралимпия ўйинларига ўзбекистон спортчиларини комплекс тайёрлаш тўғрисида”ги 5281-сонли қарори ижросини сифатли ташкил этиш мақсадида Ўзбекистон Миллий паралимпия қўмитаси бир қатор чора-тадбирлар режасини ишлаб чиққан. 

Жумладан, мамлакатимизда иқтидорли спортчиларни саралаб олиб, келажакда юртимиз шарафини муносиб ҳимоя қиладиган пара атлетларни тайёрлаш ҳам устувор вазифа сифатида белгилаб олинган.

23-24 апрель кунлари пара енгил атлетика бўйича Ўзбекистон чемпионати ўтказилмоқда. Унда республикамизнинг барча худудларидан 250 нафардан ортиқ спортчи иштирок этмоқда. Мусобақанинг очилиш маросимида Ўзбекистон Миллий паралимпия қўмитаси раҳбарияти, тренерлар ва мутахассислар иштирок этди. Ушбу мусобақадан кўзланган асосий мақсад – мамлакат терма жамоасига асосий ва захира таркибини шакллантиришдан иборат.